Rev 7 | PMA | STEP | Katau en tounah keil enek, nales angelo ehat (4) amulomal en usite ehat (4) ten out netan. Keitel telring kat angu ehat (4) keke anou lintei tounah keil en out netan, vuo en atas vuo en vatiai etai.

Revelation of John 7

Angelo Keil Aling Metai en Meatin Teis Keil Ten Out Isrel

1 Katau en tounah keil enek, nales angelo ehat (4) amulomal en usite ehat (4) ten out netan. Keitel telring kat angu ehat (4) keke anou lintei tounah keil en out netan, vuo en atas vuo en vatiai etai. 2 Ka nales angelo tateisav tamun mea ran out ist, vuli kat siil koa isen Ahi koa moul mul ien. Kei viso keih va min angelo keil ehat koa Ahi san keihoen min keil avapurun out netan ka atas 3 vit, “Minapuruntei out netan, atas, vuo vatiai keil hetokol avong meheling metai en veinan eiloheh keil koa avi onen Ahi orer hetal min siil onen.”

4 Ka nakur longlongien ten hulhulien onen koakeil akur metai onen Ahi rokol taosen heite handred tai hanumau elu ka ehat mun (144,000). Koakeil enek aka en vatiamal teindan elu (12) ten out Isrel: 5 Taosen heite teindan elu (12,000) aka retai en vatiamal vasi keil: Sudah, Ruben, Kat, Aser, Naptali, Manase, Simeon, Livae, Isekar, Sebiulon, Siosep ka Bensamin.

Meatin Keil Aka En out Vasi Netan Umai Avahou Lat Isen Ahi

9 Evus, nalele ka nales vangi meatin keil avi houlu vis avi houlu mok, meatin sakras vahul vasin keil. Vangite keil aka en meatin tateisav vasi keil, en vatiamal vasi keil, en kantri vasi keil, ka en selusien vasi keil. Keil vasi umai amulomal en meten kei koa mul en mari vulin ten keihoen ka en meten kei koa suval sili sipsip. Amusin en eisin taoh, avuli kat oumeil en he 10 ka avisohiso keih min keilu avit, “!Mututien ka venuk, Ahi, koa komul korondan en mari vulum ten keihoen, ka venuk koa kosuval sili sipsip!”

11 Navong aviteni mukonek, angelo vasi keil koa amul rahit mari vulin ten keihoen, elda keil, ka tounah ehat (4) koa amoul, keil umot avita netan min kei koa mul rondan ien, nae rokol atan, ka amasmasi. 12 Ka navong angelo keil enek amasmasi, avit,

“!Anatin eli!
!Komai mevati lat isom,
ka memasmasuk ka mesan houhouen minuk!
!Hetetamenien, meteisauen,
hiasuvien, ka keihoen
mul en Ahi orer lises ka lisenges!
!Anatin!”
13 Evus, tai en elda keil visnau vit, “?Meatin keil ekek koa amusin en eisin taoh, kokilea keil aka kave?”

14 Ka navit kesi mini vit, “Hetetamen, inau nareingeingeni, ka keik kokilea.”

Sakini kei viteni minau vit, “Meatin keil ekek, keil avatimal keih rokol keite ten mari sakvisien takeih en out netan. Keil akas eisin ome en ran kei koa suval sili sipsip ka eisin keil ome mai muoh. 15 Ven koanek, keil amulomal en meten Ahi koa mul en mari vulin ten keihoen onen, ka vongien ka meneai aros ral mini en Eim Votut onen ka uva netan mini. Kei koa rondan en mari vulin ten keihoen helei kokoe en keil. 16 Amai ka maroro herkattei mun keil ka meteiai sisil herkantei mun keil ka saloh herpuruntei keil, 17 veni kei koa suval sili sipsip koa mulomal en mari vulin ten keihoen helei kat revi keil. Helamun keil suval meatin mulamun sipsip keil, ka hetie sise min keil iha en vulioai ten moulien. Ka siamet ten mahien keil one, Ahi houl lati ran mete.”